တရုတ်က မြန်မာကို သုံးနှစ်စိုးမယ်

 ဘုန်းစည်သူ အခု တလော တရုတ်နဲ့ ပက်သက်ပြီး ပြောဆိုမူတွေ ညံလာတော့ လွန်ခဲ့တဲ့ နှစ်သုံးဆယ်ခန့်က ကျွန်တော့်ရဲ့ အဖိုး ပြောဆိုခဲ့တဲ့ "တရုတ်က မြန်မာကို သုံးနှစ် စိုးမယ်" ဆိုတဲ့ စကားကို သွားသတိ ရမိပါတယ်။ အဖိုး ပြောတာက ၁၉၈၀ ပတ်ဝန်းကျင်က ဖြစ်ပါတယ်။ ကျွန်တော်အဖိုးက အဲဒီ အချိန်က အသက် ၇၀ ကျော် ၈၀ ပိုင်းကို ၀င်နေပါပြီ။ ကျွန်တော်က ရှစ်တန်းကျောင်းသားပါ။ တစ်နေ့ မန္တလေးကို ပင့်ယူသွားတဲ့ မဟာမုနိ ရခိုင်ဘုရားကြီး အကြောင်း ပြောရင်းနဲ့ အဖိုးက "ဒီဘုရားကြီးကို တရုတ်က ရခိုင်ကို ပြန်ပို့ဖို့" ရှိတယ်ဆိုပြီး ပြောပါတယ်။ ပီးရင် အဖိုးက ဘာပြောလဲ ဆိုရင် "တရုတ်က မြန်မာကို သုံးနှစ်စိုးပြီး ပြန်အထွက်မှာ ရခိုင်ကို လွတ်လပ်ရေး ပေးခဲ့မယ် လို့လည်း" ပြောပါတယ်။

 အဖိုးပြောတော့ ကျွန်တော်တို့က "အဲဒါ ဘယ်တော့ ဖြစ်မလဲလို့" မေးတဲ့ အခါ အဖိုးက "မြေးတို့ ခေတ်မှာ ဖြစ်ချင် ဖြစ်နိုင်တယ်" ဆိုပြီး ပြောပါတယ်။ အဲသလို တရုတ်က မြန်မာကို သုံးနှစ် စိုးမယ်ဆိုတာကို အဖိုး ဘယ်လိုလုပ် သိပါသလဲလို့ မေးတော့ အဖိုးက " ရခိုင်ရာဇ၀င် ဟောကိန်း ရှိတယ်လို့" ပြောပါတယ်။ ကျွန်တော်က အဲဒီတုန်းက ရှစ်တန်း ကျောင်းသား ဆိုတော့ မြေပုံတွေ ဘာတွေကို သေသေချာချာ ကြည့်တတ်နေပါပြီ။ ဒါကြောင့် တရုတ်ပြည်နဲ့ မြန်မာနိုင်ငံ မြေပုံကို ယူလာပြီး အဖိုးကို ပြပါတယ်။ တရုတ်ပြည်နဲ့ ရခိုင်ကအဝေးကြီး။ ဘာကြောင့် တရုတ်ကလာပြီး ရခိုင်ကို လွတ်လပ်ရေး ယူပေးမလဲလို့ မေးပါတယ်။ အဖိုးကတော့ " ငါလည်း မပြောတတ်ဘူး။ ဒီလိုတော့ ရာဇ၀င် ဟောကိန်း ရှိတယ်" ဆိုပြီး အဖိုးက ပြောပါတယ်။ အဖိုးဟာ စာပေ ကျမ်းကန် နှံ့စပ်တဲ့ ပုဂ္ဂိုလ် တစ်ဦး ဖြစ်ပါတယ်။ မြန်မာစာ၊ ရခိုင်စာကို ပြေပြေပြစ်ပြစ် ရေးသားနိုင်သူ ဖြစ်ပါတယ်။ အဖိုးရဲ့ ရေးတဲ့ လက်ရေးတွေဟာ ညီညာ သေသပ်ပြီး အထူးသဖြင့် ယပင့်တွေဟာ အထူး ညီညာပီး ပြေပြစ်ပါတယ်။ အဖိုးရဲ့ ဆရာက ဓည၀တီ ရာဇ၀င်သစ်ကျမ်းကို ရေးတဲ့ ဆရာတော် ဦးဥာဏ ဖြစ်ပါတယ်။ အဖိုးဟာ အင်္ဂလိပ်၊ ဂျပန်ခေတ်နဲ့ ပါလီမန် ဒီမိုကရေစီ ခေတ်ထိ ရခိုင်မှာ ရွာသူကြီး လုပ်ခဲ့သူ ဖြစ်ပါတယ်။ မြန်မာနိုင်ငံ အနှံ့အပြား ကိုလည်း ရောက်ဖူးသူ ဖြစ်ပါတယ်။ အဖိုးကို ကျွန်တော်တို့က ဘုရားစာ တရားစာက အစ ရေးသား ပြောဆိုနိုင်တဲ့ အတွက် လေးစား တန်ဖိုးထားပေမယ့် အဲသလို အဖိုး ပြောကြားတဲ့ အပေါ် ကျွန်တော်တို့က ခလေးတွေး တွေးပြီး သိပ်မယုံကြည်ရဲဘဲ ဖြစ်နေ ခဲ့ပါတယ်။ အဲဒီတုန်းကလည်း တရုတ်နဲ့ မြန်မာ အကြားမှာ ဆက်စပ်မူ သိပ်မရှိသလို တရုတ် မြန်မာနိုင်ငံကို ကျူးကျော်ဖို့ အကြောင်းအရာကလည်း ဘာမှ မရှိပါဘူး။ ဒါ့အပြင် နေရာ ဒေသ အကွားအဝေးကို ကြည့်တော့လည်း တရုတ်ပြည်ဟာ ရခိုင်နဲ့ အဝေးကြီး ဖြစ်သလို ကြားမှာလည်း ဗမာပြည်ကြီးက ခံနေလို့ ဖြစ်ပါတယ်။ ဒါကြောင့် အဖိုးပြောဆိုခဲ့တဲ့ စကား အပေါ်မှာ သိပ် လေးလေးနက်နက် မထားခဲ့ပါဘူး။ ကျွန်တော်လည်း အသက်အရွယ် ကြီးရင့်လာတော့ နိုင်ငံရေး လောကထဲမှာ ကျင်လည်ရင်း အဖိုး ပြောဆိုခဲ့တာတွေကို မေ့မေ့ပျောက်ပျောက် ဖြစ်သွားခဲ့ပါတယ်။ နောက်ပိုင်းမှာ တရုတ်က ရခိုင် ကျောက်ဖြူမှာ တည်ဆောက်မယ့် ဧရာမ ရေနက် ဆိပ်ကမ်း စီမံကိန်းတွေ၊ ဂတ်စ်နဲ့ ရေနံပိုက်လိုင်း စီမံကိန်းကြီးတွေ အပြင် တရုတ်က တည်ဆောက်မယ့် မြစ်ဆုံ ရေကာတာကြီးတွေကို မြင်လာရတော့ အဖိုးပြောတာကို သွားသတိ ရမိပါတယ်။ အဲဒီခါမှ အဖိုး ပြောခဲ့တာတွေလည်း ဖြစ်နိုင်သားဘဲလို့ တွေးတော လာမိပါတယ်။ အဖိုးပြောခဲ့တဲ့ စကားတွေကို လက်ရှိ မြန်မာနိုင်ငံတွင်း ဖြစ်ပေါ်နေတဲ့ အခြေအနေတွေနဲ့ ယှဉ်ထိုးကြည့်တဲ့ အခါ ဖြစ်နိုင်တဲ့ အခြေအနေတွေ ရှိနေပါလားလို့ ဆင်ခြင် သုံးသပ် လာမိ ပါတယ်။ လွန်ခဲ့တဲ့ အနှစ် သုံးဆယ်က အဖိုးပြောခဲ့တဲ့ စကားဟာ လက်တွေ့ မဆံလှပေမယ့် လက်ရှိ ဖြစ်ပေါ်နေတဲ့ အခြေအနေနဲ့ ယှဉ်ထိုးကြည့်တဲ့ အခါ မှန်သယောင်ယောင် ရှိနေပါတယ်။ အဲဒါနဲ့ ရင်းနှီးတဲ့ မိတ်ဆွေ တစ်ယောက်နဲ့ စကားပြောရင် တရုတ်က တည်ဆောက် နေတဲ့ စီမံကိန်းတွေ အကြောင်း ပြောဖြစ်တော့ သူက ဥပမာ တစ်ခုပေးပါတယ်။ “ ဆင်းရဲတဲ့ မိသားစု တစ်ခုရဲ့ ခြံဝင်း တစ်ခုထဲကို ရွာထဲက သြဇာရှိသူ ပိုက်ဆံ ရှိသူ တစ်ဦးက မင်းရဲ့ ခြံဝင်းက ကျယ်တဲ့ အတွက် ငါအပန်းဖြေဖို့ အိမ်လေး တစ်လုံး ဆောက်ချင်တယ်လို့ ပြောပြီး အိမ်ဆောက်တဲ့ အခါ ဆင်းရဲတဲ့ မိသားစုတွေနေတဲ့ အိမ်ထက် ငါးဆခန့်ကြီးပီး တသက်လုံးနေလို့ ရအောင် ခိုင်ခိုင်ခန့်ခန့် ဆောက်လိုက်တယ် ဆိုရင် သူရဲ့ နောက်ကွယ်က ရည်ရွယ်ချက်ဟာ ဘာလဲဆိုတာကို လူတိုင်း မစဉ်းစားဘဲ အဖြေထုတ်လို့ ရတယ်လို့ ပြောပါတယ်။ အခုလည်း တရုတ်က ဆောက်နေတဲ့ ကျောက်ဖြူ ရေနက်ဆိပ်ကမ်း စီမံကိန်းတို့၊ မဒဲကျွန်း ရေနံတင် ဆိပ်ကမ်းတို့ ဆိုတာ မြန်မာ အစိုရကတောင် မဆောက် နိုင်တဲ့ ဧရာမ ကြီးမားတဲ့ စီမံကိန်းကြီးတွေ ဖြစ်ကြတယ်။ ဒါကြောင့် တရုတ် ဘယ်ခြေလှမ်းကို လှမ်းဖို့ လုပ်နေတယ်ဆိုတာ သတိထားဖို့ လိုတယ်လို့ ပြောပါတယ်။ တကယ်တန်း စဉ်းစားကြည့်ရင်လည်း မြန်မာ အစိုးရကတောင်မှ မတည် ဆောက်နိုင်တဲ့ ဒီလို စီမံကိန်းကြီးတွေကို ရခိုင်မှာ တရုတ်က တည်ဆောက်နေတော့ တရုတ်ရဲ့ ဦးတည်ချက် ဘာကို ရည်ရွယ်နေတယ်ဆိုတာကို လူတိုင်း သိသာ ထင်ရှားစွာ မြင်နိုင်ပါတယ်။ ရခိုင်ပြည်နယ် ကျောက်ဖြူက မြန်မာနိုင်ငံ အလယ်ပိုင်းနဲ့ ရှမ်းပြည်နယ် မြောက်ပိုင်းကို ဖြတ်ပြီး တရုတ် ကို ပို့လွှတ်မယ့် ရေနံနဲ့ ဂက်စ် ပိုက်လိုင်း စီမံကိန်းဟာ နောင်အခါ တရုတ်ပြည်ရဲ့ အရေးကြီးဆုံး အသက် သွေးကြောကြီး ဖြစ်လာတော့မှာ ဖြစ်ပါတယ်။ အာဖရိကတိုက် တတိုက်လုံးနဲ့ အရှေ့ အလယ်ပိုင်းက လာတဲ့ ရေနံတွေအပြင် မြန်မာနိုင်ငံက ဂက်စ်တွေဟာ အဲဒီ ပိုက်လိုင်းတွေ တဆင့် တရုတ်နိုင်ငံ ယူနန်ပြည်နယ် ထဲကို သယ်ယူမှာ ဖြစ်ပါတယ်။ ဒီပမာဏဟာ တရုတ် နိုင်ငံရဲ့ စွမ်းအင်လိုအပ်ချက် အနည်းဆုံး ၈ဝ ရာခိုင်နုန်း ဖြစ်နေတဲ့ အတွက် အင်မတန် တန်ဖိုးကြီးမားပါတယ်။ ဒါကြောင့် ဒီစီမံကိန်းကြီးဟာ တရုတ်အတွက် အလွန် အရေးကြီးတဲ့ စီမံကိန်း ဖြစ်ပါတယ်။ တနည်းအား ဖြင့် ပြောရရင် တရုတ် အတွက် မြစ်ဆုံရေကာတာထက် အရေးကြီးပါတယ်။ ဒါ့အပြင် ဂတ်စ် ပိုက်လိုင်းနဲ့ အတူ အမြန် မီးရထားလမ်း တစ်ခုကို ဖောက်လုပ်ဖို့လည်း သဘောတူထားပြီး ဖြစ်ပါတယ်။ အမြန် မီးရထားလမ်းက ဘာကြောင့် ဖေါက်လုပ်ဖို့ လိုသလဲ ဆိုတာလည်း စဉ်းစားစရာ ဖြစ်ပါတယ်။ ဒါကြောင့် တရုတ်ဟာ ဒီလို ကြီးမားတဲ့ ရေရှည် စီမံကိန်းတွေကြောင့် မြန်မာနိုင်ငံက ဘယ်တော့မှ လက်ပိုက်ပြီး ထွက်သွားတော့မှာ မဟုတ်ဘူးဆိုတာက သေချာ သလောက် ဖြစ်သွားပါပြီ။ ဒီစီမံကိန်းတွေနဲ့ ပတ်သက်ပြီးလည်း သူ့ အကျိုးစီးပွား အတွက် တရုတ်က နည်းနည်းလေးမှ အထိအခိုက်ခံမှာ မဟုတ်သလို ထိခိုက်လာရင်လည်း မြန်မာ နိုင်ငံကို ကျူးကျော်ကောင်း ကျော်ကျူး လာနိုင်ပါတယ်။ အဖိုး ပြောခဲ့တဲ့ စကားကတော့ လက်တွေ့ မဆံလှတဲ့ ဟောကိန်း တစ်ခု ဖြစ်ပါတယ်။ ဒါပေမယ့် အဖိုးပြောခဲ့တဲ့ ဟောကိန်းဟာ လက်တွေ့ အခြေအနေနဲ့ နိုင်းယှဉ်ကြည့်တဲ့ အခါ တိုက်ဆိုင်မူတွေ ရှိလာတဲ့အတွက် သတိ တရား လက်ကိုင် ထားပြီး ဆင်ခြင်ဖို့နဲ့ ဝေဖန် သုံးသပ်နိုင်ကြဖို့ ရည်ရွယ်ချက်နဲ့ ရေးသားလိုက်ရတာ ဖြစ်ပါတယ်။ ဘုရားရှင်ရဲ့ ဗျာဒိတ်တော်ကို အခြေခံပြီး နောင်သော ကာလမှာ ဖြစ်ပေါ်လာမယ့် အကြောင်း အရာ တွေကို ရခိုင် ရှေးဟောင်း ကျောက်ရိုး ရာဇ၀င်မှာ ရေးသားထားခဲ့ရာမှာ မြန်မာနဲ့ ပတ်သက်ပြီး ခုလို ရေးသား ထားတာကို တွေ့ရပါတယ်။ အပိုဒ် (၅၇)-မြန်မာပြည်ကို မသွယ်မှန်စွာ မသမာ တရုပ် ဖျက်လိမ္မည်။ အပိုဒ် (၅၈)-ကုလား တရုပ် ရန်ဘေးချက်ကြောင့် မြန်မာရခိုင် ထိုခါစစ်ပွဲဖြစ်လိမ္မည်။ အပိုဒ် (၅၉)-မြန်မာပြည်ကြီး အပြီးထိုခါပျက်လိမ္မည်- လို့ ရေးသားဖေါ်ပြထားပါတယ်။ (ပြီး)
http://www.narinjara.com/detailsbur.asp?id=3522