အဝေးရောက်သားသမီးများသို့ ..လူထုဒေါ်အမာ

အဝေးရောက်သားသမီးများသို့ 
နိုင်ငံခြား တိုင်းပြည် တခုကို ရောက်နေတဲ့ ကျမ မြေးကလေး နှစ်ဦးဆီက စာများရတယ်။ သူတို့ စာတွေထဲမှာ သူတို့ရောက်တဲ့ နိုင်ငံရဲ့ စီးပွားရေး အဆင့်အတန်း၊ လူမှုရေး အဆင့်အတန်းနဲ့ ပညာရေး အဆင့်အတန်းကို သူတို့ အကဲခတ် တတ်သလောက် အကဲခတ် ပြတာလည်း ပါတယ်။ အဲဒီ တိုင်းပြည်မှာ ကျမတို့ နိုင်ငံလို သယံဇာတ ဘာမှ မကြွယ်ဝဘဲနဲ့ အဲဒီ အဆင့်အတန်းမျိုး ရောက်နေကြတယ် ဆိုတဲ့ သူတို့ စိတ်ထဲ မချင့်မရဲ ဖြစ်ပုံတွေလည်း ပါတယ်။


မြေးမ တယောက်ဆီက စာမှာတော့ သူတို့ ရောက်နေတဲ့ နိုင်ငံမှာ လခလစာ ဘယ်ရွေ့ ဘယ်လောက်ရတယ်၊ မြန်မာငွေနဲ့ တွက်ကြည့်ရင် သိန်းချီ ရနေတဲ့ အဓိပ္ပာယ် ရှိတယ်။ နေရေး ထိုင်ရေးလည်း အစစ အဆင်ပြေတယ်။ ဒါပေမဲ့ သူမပျော်ဘူး၊ အဲဒီ နိုင်ငံမှာ အကြာကြီး မနေချင်ဘူးတဲ့။ အခုထိ သူအလုပ် မလုပ်သေးဘူး၊ သူ့ယောက်ျားပဲ အလုပ် လုပ်နေတယ်။ ပုံတော်ရင်တော့ သူအလုပ်ဝင် လုပ်မယ်။ လုပ်ပြီးရင် ငွေစုမယ်။ နှစ်နှစ် သုံးနှစ် ကြာရင်တော့ သူတို့ ပြန်လာမယ်လို့ ပါပါတယ်။

မြေးယောက်ျားလေးရဲ့ စာထဲမှာတော့ သူတို့ ရောက်နေတဲ့ နိုင်ငံရဲ့ တိုးတက်ပုံတွေ၊ မြန်မာနိုင်ငံထက် မူလက အောက်ကျတဲ့ နိုင်ငံဟာ နှစ်နည်းနည်းလေး အတွင်းမှာ အင်မတန် တိုးတက် အောင်မြင် နေပုံတွေကို အလွန် ဝမ်းပါးပြီး ရေးထားပါတယ်။

ကျမတို့ နိုင်ငံကနေပြီး ထိုင်းလင်း၊ မလေး၊ စင်ကာပူ၊ ဂျပန် စတဲ့ နိုင်ငံတွေမှာ ပညာတတ် လူငယ်တွေ အတော်များများ ရောက်ရှိ နေကြပါပြီ။ အနောက်နိုင်ငံတွေမှာလည်း ရောက်သင့် သလောက်တော့ ရောက်နေကြတာပဲ။ ဒါမျိုးကို အနောက်နိုင်ငံတွေမှာတော့ ဦးနှောက်ယိုစီးမှု Brain Drain လို့ သုံးနှုန်းပါတယ်။ ကိုယ့်နိုင်ငံထဲက ဦးနှောက်ကောင်းတဲ့ ပညာတတ်တွေ တိုင်းတပါး ရောက်ကုန်တာကို နှမြောတဲ့ သဘောပါပါတယ်။

ဒီလို ပညာတတ်တွေနဲ့ အတူ ကျမတို့ နိုင်ငံ တနင်္သာရီတိုင်းဘက်က၊ ကရင်ပြည်နယ်ဘက်က၊ မြစ်ဝက္ဆွန်းပေါ် ဒေသက အလုပ်သမား၊ လယ်သမား လူတန်းစားတွေလည်း အိမ်နီးချင်း နိုင်ငံတွေကို သွားရောက်ပြီး အလုပ်လုပ် နေကြတာ တော်တော်များများ ရှိနေပြီလို့ ကြားရပါတယ်။ ဒီလို လယ်သမားတွေ အလုပ်သမားတွေ ထွက်ခွာသွားမှုကိုတော့ လုပ်အားတွေ ဖိတ်စင် ယိုစီးမှုလို့ ခေါ်ရမယ် ထင်ပါတယ်။ ဒီလူတွေ ဆီကတော့ စာတွေ ဘာတွေ မရနိုင်ပါဘူး။ သူတို့ခမျာမယ် ရရာအလုပ်ကို ပေးသမျှ လခနဲ့ ဝင်လုပ်ပြီး ဖြစ်သလို နေထိုင်ကြရ သူများပေကိုး။

သူများနိုင်ငံတွေကို အခုလို ထွက်ပြီး စီးပွားရှာ နေကြရပေမယ့် သူတို့ အားလုံးဟာ မပျော်ကြဘူး။ အကြာကြီး နေဖို့လည်း စိတ်မကူးကြဘူး။ ငွေရှာလို့ ရရင် အမိနိုင်ငံကို ပြန်လာမှာပဲ ဆိုတာ အားလုံးလောက် နီးပါးရဲ့ စိတ်ထဲမှာ ရှိကြပါတယ်။

ကျမကို အဝေးရောက် ဆွေမျိုးများက တလှည့်တပတ် သူတို့ဆို လာနေပါလားလို့ ခေါ်သူရှိပါတယ်။ ကျမလည်း တခြားလူတွေလိုပါပဲ၊ နိုင်ငံခြားမှာ ပျော်အောင် မနေတတ်ပါဘူး။ ခဏတဖြုတ် မရောက်ဖူးတဲ့ နေရာ၊ မမြင်ဘူးတဲ့ မြင်ကွင်းနဲ့ ရှုခင်းတွေကို ကြည့်ရ၊ မြင်ရပြီးရင် ပြန်ချင်မှာပါ။ ကိုယ့်နိုင်ငံ ကိုယ့်ဒေသလောက် နေပျော်တာ မရှိပါဘူး။ ကိုယ့်လူမျိုးလောက် သဘောကျစရာ ကောင်းတာလည်း မရှိပါဘူး။ ကိုယ့်လူမျိုး အချင်းချင်းနဲ့ပဲ ပေါင်းသင်း ဆက်ဆံချင်တယ်။

ကျမတို့ ဆီမှာ လူမျိုးအလိုက် ရှိနေတဲ့ ဉာဉ်ဆိုးကလေးတွေတော့ ရှိသလောက် ရှိတာပေါ့။ ဥပမာ ပျင်းရိတာ၊ ဇွဲမရှိတာ၊ အနွံအတာ မခံချင်တာ၊ သိပ်အောက်မကျို့ချင်တာ၊ ပျော်ပျော်ပါးပါး ပေါ့ပေါ့တန်တန်နဲ့ အချိန်ကုန်ချင်တာ မျိုးကလေးတွေလေ။

ဒီအားနည်းချက် ချို့တဲ့ချက်မျိုးတော့ ကျမတို့ လူမျိုးမှာ ရှိပါတယ်။ နို့ပေမယ့် ဒါက တသက်လုံး ဘယ်လိုမှ ပြင်မရနိုင်တဲ့ လူမျိုးစရိုက်ကြီး ဆိုပြီး ပစ်မထားဘဲနဲ့၊ ယုံကြည်မှု၊ စည်းလုံးမှု၊ တက်ွ့ကမှုတွေနဲ့ တိုက်ဖျက်ကြမယ်၊ ရှေ့ဆောင် ရှေ့ရွက် ပြုသူတွေက စနစ်တကျ စည်းရုံး ပညာပေးပြီး အားလုံး လက်တွဲ ကြိုးစားကြမယ် ဆိုရင် ပြုပြင်လို့ ရရမှာပေါ့။ ပျော့ညံ့ချက်ဟာ ဘာမို့ ခံနိုင်ရမှာတုန်း။ အရေးကြီးတာက ဒီလိုပြုပြင်မှာက ဘာအတွက်၊ ဘယ်သူ့ဖို့ ပြုပြင်မှာဆိုတဲ့ မှန်ကန်မွန်မြတ်တဲ့ အသိရှိဖို့ပဲ လိုပါတယ်။

ကျမတို့ လူမျိုးဟာ အလွန် အကင်းပါးတဲ့ လူမျိုးပါ။ သင်လိုက်ရင် သိလွယ်မြင်လွယ် တတ်လွယ် သိပ်ရှိပါတယ်။ ဒီအရည်အသွေးဟာ ငွေပေးဝယ်လို့ မရပါဘူး။ ကျမတို့ လူမျိုးနဲ့ တခြား လူမျိုးနဲ့ ယှဉ်ကြည့်စမ်းပါ။ ပညာတတ်ခြင်း ဖြစ်ဖြစ်၊ ပညာမဲ့ အလုပ်သမား လယ်သမား လူတန်းစားခြင်း ဖြစ်ဖြစ် လူမျိုးအလိုက် အကင်းပါး ဖျတ်လတ်မှုက အလွန်ကို သဘောကျစရာ ကောင်းပါတယ်။ အဲဒီတော့ ဘာပညာ ဘာအလုပ်မျိုးကို မဆို ကျမတို့မှာ မသင်ရသေးလို့ မတတ်သေးပေမယ့် သင်ခွင့်ရတဲ့ တချိန် သူများနည်းတူ ရင်ပေါင်တန်းနိုင်တဲ့ အရည်အသွေး အပြည့်အဝ ရှိပါတယ်။ လူဟာ နုံပြီဆိုရင် ဆွဲတိုင်း မပါနိုင်ပါဘူး။ တွန်းတိုင်း မရောက်လာဘူး။ ကျမတို့ လူမျိုးတွေက အနုံအဖျင်း မဟုတ်ကြဘူး။ သိပ်ကို အကင်းပါးတဲ့ လူမျိုး။

ပြီးတော့ ကျမတို့ နိုင်ငံလောက် လုပ်စရာ ကိုင်စရာတွေ ပွေွါ့ကယ်ဝတဲ့ နိုင်ငံမျိုး ဒီကမ္ဘာမှာ အတော်ရှားပါတယ်။ ကျမဟာ အကြောင်း အားလျော်စွာ သူများနိုင်ငံ အတော်များများကို ရောက်ဖူးခဲ့ပါတယ်။

တချို့ စက်မှု အလွန် ထွန်းကားတယ် ဆိုတဲ့ နိုင်ငံကြီးတွေမှာ သူတို့ပိုင် ပြည်တွင်းထွက် ဘာမှ မယ်မယ်ရရ ရှိတာ မဟုတ်ဘူး။ စက်မှုအတွက် သုံးစာရာ ရေနံလို ကျောက်မီးသွေးလို ရှိတာ မဟုတ်ဘဲ သူများနိုင်ငံက ဝယ်သုံးပြီး စက်ရုံတွေကို လည်ပတ် နေကြရတာမျိုး။ တချို့က သတ္တုကို သူများနိုင်ငံက မှာရတာမျိုး။ အထူးသဖြင့် ဥရောပ နိုင်ငံတွေဟာ စားရေ ရိက္ခာလည်း ကိုယ့်မှာက မလုံလောက်၊ စက်ရုံ အလုပ်ရုံတွေ အတွက် ကုန်ကြမ်းလည်း သူများ နှာခေါင်းနဲ့ အသက်ရှုပြီး လုပ်ဆောင် နေကြတာကို တွေ့ရတယ်။

ကျမတို့ နိုင်ငံမှာ ကျမတို့ လူမျိုးတွေ စားဖို့ သောက်ဖို့ ဆိုတာ ကျမတို့ နိုင်ငံထဲက ထွက်တာဟာ လုံလောက်ရုံမက နိုင်ငံခြားတောင် တင်ပို့ ရောင်းချ နေရပါသေးတယ်။ ရိက္ခာ အတွက် ပူစရာ မရှိပါဘူး။ စိုက်ပျိုးနိုင်တဲ့ နေရာ မှန်သမျှမှာသာ စိုက်ပျိုး၊ ငတ်မှာ မပူရပါဘူး။ ရိက္ခာတွင်လား၊ လူမှာ စားဝတ် နေရေးလို့ အရေးသုံးပါး ရှိတယ်။ ဝတ်ဖို့ အရေးကောလို့ မေးလာရင် ဝါဂွမ်းစိုက်လို့ မြန်မာနိုင်ငံ အလယ်ပိုင်းက ကောင်းကောင်းရပါတယ်။ စိုက်လည်း စိုက်နေပါတယ်။ က္ဆွန်ဘဝတုန်းက စတီးဘရားသားတို့လို အရင်းရှင် လက်ဝါးကြီးအုပ်တွေက မြန်မာ ဝါတောင်သူတွေဆီက ဝါဝယ်ပြီး နိုင်ငံခြား တင်ပို့လာ ခဲ့ကြတာပါ။ ကျမတို့ ဥတုရာသီနဲ့ တကယ် လိုက်ဖက်တဲ့ ချည်ထည် ရက်လုပ် ဝတ်ဆင်ဖို့ ကိုယ့်နိုင်ငံထဲကချည်း ပြည့်စုံနိုင်ပါတယ်။

နေရေး အတွက်ကော သူများ နိုင်ငံတွေမှာ မရှိတဲ့ သစ်တောကြီးတွေ ကျမတို့မှာ ရှိတယ်။ ဒီသစ်တောကြီးက ထွက်တဲ့ သစ်နဲ့ အိမ်ဆောက် နေနိုင်တယ်။ နိုင်ငံခြားကို သစ်ရောင်းပြီး တလျှောက်လုံး နိုင်ငံခြားငွေ ရအောင် မြန်မာသစ်နဲ့ ငွေရှာလာခဲ့တဲ့ နိုင်ငံပါ။

စားစရာ၊ ဝတ်စရာ၊ နေစရာတွင်လား ဆိုတော့ ဟုတ်ပါရိုးလား၊ ရေနံတို့၊ ကျောက်မီးသွေးတို့ကလည်း ထွက်နေသေးရဲ့၊ ရွှေငွေ ကျောက်သံ ပတ္တမြားတွေကလည်း နေရာပေါင်း များစွာက ထွက်နေသေးတယ်။ ရှိမှန်း မသိလို့ မတူးဖော် မရှာဖွေ ရသေးတာကလည်း ဘယ်လောက်များ ဦးမယ် မသိဘူး။ တောက်တီး တောက်တဲ့ မမှတ်ပါနဲ့။ တကယ် ချမ်းသာတဲ့ နိုင်ငံပါ။

ဒါကြောင့် ရိုးရိုးကုတ်ကုတ် လုပ်စားနေတယ် ဆိုဦးတော့ လူဦးရေ ထိန်းချုပ်စရာတောင် မလိုသေးဘဲ ဒူးနန့်ပြီး လုပ်ကိုင် စားနေနိုင်တဲ့ နိုင်ငံပါ။

အမိနိုင်ငံဟာ ဒီလို ပွေွါ့ကယ်ဝတာနဲ့ အတူ အမိနိုင်ငံမှာရှိတဲ့ ဘာသာတရားကလည်း သူတပါးကို မေတ္တာ ထားနိုင်တယ်။ ကိုယ့်ထက် ဆင်းရဲ ဒုက္ခရောက်သူကို သနားကရုဏာ သက်နိုင်တယ်။ ကိုယ်နဲ့ အတူရှိသူ၊ ကိုယ့်ထက်သာသူကို ဝမ်းသာ အယ်လဲ သာဓု ခေါ်နိုင်တယ်။ မရှိရင် ဝေစားမယ်လို့ ပေးနိုင် ကွေ္ဆးနိုင်တယ်။ သူတပါးရဲ့ ကျုးကျော် စော်ကားမှုကို သည်းခံခွင့်လွှတ် ချေဖျောက်နိုင်တဲ့ ဘာသာတရားမျိုးကိုလည်း လက်ကိုင် ထားကြသေးတယ်။ တင်းတိမ် ရောင့်ရဲမှုကိုလည်း ကျင့်သုံး လိုက်ကြသေးတယ်။

ကဲ၊ ဘယ်လောက် နေချင်စဖွယ် ကောင်းတဲ့ နိုင်ငံပါလဲ။
♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥
ဒါနဲ့များ လူတွေ ဘာလို့များ သူများနိုင်ငံတွေ ထွက်ပြီး ရှာဖွေ နေကြရသလဲလို့ မေးလာရင်တော့ ဒါဟာ အခိုက်အတန့် ကိစ္စ၊ အစာဝတော့ ဌာန ပြန်မည့်သူချည်း။ ကျမတို့ နိုင်ငံမှာ လွတ်လွတ်လပ်လပ် အေးအေးချမ်းချမ်း စည်းစည်းလုံးလုံးနဲ့ ညီညီညွတ်ညွတ် အချင်းချင်း လက်တွဲ လုပ်ဆောင်နိုင်ကြရင် ဘာမှ မကြာတဲ့ ကာလမှာ လုပ်စရာ အလုပ်တွေ တောင်ပုံရာပုံ ရှိလာမှာ၊ အဲဒီတော့ အဝေးရောက် သားသမီးတွေလည်း အားလုံး ပြန်လာကြမှာ၊ သူများ နိုင်ငံတွေလို ခုမချမ်းသာ သေးသကောလုိ့ စိတ်ဓာတ် မကျပါဘူး။ ကျမတို့ဟာ မြန်မာ့ ရေမြေပေါ်က မြန်မာတွေပါ။ ။

လူထုဒေါ်အမာ